طريقة تحضير البغرير فالدار: بغرير خفيف ومثقب، مع صوص الزبدة والعسل
طريقة تحضير البغرير فالدار خطوة بخطوة: المكونات، كيفاش يجي مثقب ورطب، الأخطاء اللي خاصكم تبعدو منها، وصوص الزبدة والعسل اللي كيكمل الفطور المغربي.
اقرأ المقال
وصفات
الرفيسة المغربية بالدجاج البلدي: الوصفة التقليدية خطوة بخطوة
الرفيسة هي أكلة اللمة والمناسبات فالمغرب: العقيقة، النفاسة، ونهار الجمعة مع العائلة. فالبادية كنطيبوها بالدجاج البلدي، المسمن المقطع (التريد)، العدس والحلبة. فهاد المقال كتلقاو الوصفة مكتوبة بالمقادير، والفيديو اللي طيبناها فيه فوسط الطبيعة.
المكونات
- دجاجة بلدية مقطعة (تقريبا 1.5 كيلو)
- 3 ديال البصل المقطع رقيق
- نص كاس ديال العدس
- 2 معالق ديال الحلبة مغموسة فالما ليلة قبل
- معلقة ديال راس الحانوت
- معلقة ديال السكنجبير، معلقة ديال الإبزار ونص معلقة ديال الكوركم
- شوية ديال الزعفران الحر والملح حسب الذوق
- معلقة ديال السمن البلدي
- نص كاس ديال زيت الزيتون البلدي
- شوية ديال المعدنوس والقزبر مربوطين
- التريد أو المسمن الرقيق (تقريبا 12 حبة) مقطع باليدين
طريقة التحضير
- خلطو الدجاج مع البصل والتوابل والزعفران والملح والزيت والسمن، وخليوه يتشرب شي نص ساعة إلا كان عندكم الوقت.
- حطو الطنجرة على العافية وقلبو الدجاج شي دقايق حتى يبدا البصل يذبال.
- زيدو الحلبة والمعدنوس والقزبر والما حتى يغطي الدجاج، وخليوه يطيب على نار هادية.
- من بعد شي ساعة، زيدو العدس وزيدو الما إلا احتاج، وكملو الطياب حتى يطيب الدجاج والعدس وتولي المرقة غنية.
- سخنو التريد أو المسمن المقطع فالكسكاس فوق البخار.
- فالقصعة، حطو التريد، سقيوه بالمرقة شوية بشوية باش يتشرب بلا ما يذوب، وحطو الدجاج والعدس الفوق.
- قدموها سخونة مع شوية ديال المرقة فوق.
نصائح من البادية
- الدجاج البلدي كياخد وقت أكثر فالطياب من دجاج السوق، ولكن الطعم ديالو ما كيتقارنش.
- الحلبة هي اللي كتعطي الريحة المميزة ديال الرفيسة. غمسوها فالما قبل باش ما تبقاش مرة.
- الطياب على الحطب كيعطي نكهة مدخنة خفيفة، ولكن البوطاغاز كيصلاح بحال بحال.
شوفو حتى
الفيديو اللي أطلقنا فيه المشروع ديالنا وطيبنا فيه الرفيسة بالفروج البلدي، ووصفات أخرى من البادية: الطنجية المراكشية والسفة المدفونة بالدجاج.
2 تعليقات